黃良成

黃良成

　　國小校長退休了後，開始佇社區結合區公所辦理台語文化班，公益推廣，目前開拓十？爬甈F區域，嘛成立「台語文化班學會」，擔任理事長兼班程講師。

　　作者自成立學會了後，鼓勵會員台語創作，編輯學員作品出版成冊，比如111年的《感恩啟帆》、112年的《再造前景》、113年的《向望繁華》。嘛為著證明台語會當書寫任何代誌，科學、醫學甚至是喙齒等等，特別共伊種齒的過程，開欲兩百萬的心酸苦痛，佇113年6月出版《種齒驚魂記》，得著濟濟的回響。

　　台語文化班開班已經第九年矣，暗時上課的合照加上課程活動的主題，構思情境四句聯，編輯做早安圖卡，欲傳承台語文化。如今，揀選最近這三年的四句聯，加賞析註解，選相片對應詩文，總共倚欲四百首，所以號名「台詩三百首～情境四句聯」，實在有相當的數量，所以出版分做兩冊《台語講予伊鬥句》、《台語講予伊紲拍》，向望會當提升社會人士的台語文化。

　　作者形容這兩本冊是現代褒歌，四句聯的形式，過去古早、民間口傳通俗的傳統褒歌，是愛保存，猶毋過，咱更加愛活佇現此時，這兩本冊是現代社會進行式，欲予社會人士感受台語的文雅，台語詩詞自來就毋是老古董，向望逐家做伙來享受。